65th YMA GENERAL CONFERENCE 2010 LUNGLEI
AIDS AWARENESS CAMPAIGN – 20 October 2010 Saikuti Hall, Lunglei
Dr. Eric Zomawia, Project Director
Mizoram State AIDS Control Society

           Pu Chairman leh ram tana ka thawhpui ka YMA member pui zawng zawng te, in zavaiin chibai ka buk a che u.

           YMA General conference vawi 65 na, YMA Platinum Jubili kan hman mek kumah ka pianna leh seilenna Lunglei khuaah ngei mai in hmaa thu tlem sawi tura hun pek ka ni hi ka lawm tak zet a. Tin, YMA in AIDS theihtawpin a do avangte, damlo mangangte chhanchhuah nana tlawmngaia YMA member tam takin Thisen pek kan pek thin vang te, kan ram hmelma lian AIDS phirpui chiah Drugs, YMA in a do avang kan ram Thalai tam tak chhanchhuaha an awm avangin lawmthu ka sawi hmasa duh a ni.

           Kum 20 kal ta atang khan kan ram duh tak Mizoram hi HIV AIDS in min rawn run tan ve a. October 1990 khan drug addict 9 te chu HIV Positive an ni tih hmuhchhuah hmasak ber an ni. Chumi atang chuan Thlaiin Leitha a ngeih em em ang mai hian kan ram hi HIV hian a ngeih em em mai a, rei lote chhungin, kan inrin tak tak hma in, ‘AIDS te chu mi ram natna alawm’, tia thawnthu ngaihnawm tak ang chauha ngaia ‘kei chuan ka kai ve chuang lovang’ kan tih theuh lain mi 5000 zet chu HIV hrik pai hmuhchhuah an awm ta reng mai; nitin mi 4 HIV kai hmuhchhuah thar an awm ta. MSACS chhut danin mi 5000 hmuhchhuah an awm chuan hmuhchhuah lohte nen chuan HIV hrik pai hi 20,000 atanga 40,000 kan awm tawh tura ngaih a ni. A rapthlak I ti ve em?

           Hetiang reng a nih chuan Africa ram thenkhat an sawi ang khu kan hlat vak lo. Africa ram kum 5-10 kal ta leh tuna Mizoram dinhmun hi a in ang hle nghe nghe. Africa a an tihsual lian tak chu sex a hluar a, chuti chungin HIV laka invenna an ngaihsak lova, mimal leh pawl hrang hrangte’n duh angin hma an la tha lova, Kohhran a ngawi reng a, HIV kai te chu thinhrik leh endawnga an awm avangin an biru em em a, a tawi zawngin an harh chhuak tlai lutuk a, tun dinhmun khu an thleng ta a ni. Africa ram tam tak dinhmun khu a rapthlak em em a, thalai zawng zawng 25% hial HIV hrik pai te, Nu naupai inentir zawng zawng 40% lai HIV hrik pai te an ni ta nawk mai. A ni telin thalai tam tak AIDS avangin an thi phawk phawk a, nu leh pa vuiliamtu tur zawka ngaih thalaite chu an nu leh pa te’n an vui liam a ngai ta zawk a; chhungkuaa ei zawnga hnathawk thei thalaite’n AIDS avangin an eizawnna an chawlhsan a ngai a, an damloh avangin sum tam tak an sen belh a ngai bawk si, an ram an in an hralh a, retheihna atangin retheih leh zualnaah an lut a, an eizawnna neih chhun chu AIDS vei chunga Inzawrha AIDS thehdarh a lo ni leh a. Mitthi dahna tur Kuang zawrhte chu sumdawnna hlawk a lo ni a, zirtirtu te, doctor leh nurse damlo enkawltu tur berte pawh an damlo a, an ram economy in a tlakchhiat phah nasa em em a ni. Tunah khuan Sorkar leh Kohhrante harhchhuakin ram dang tanpuina nen nasa takin hma an han la chho leh a, mahse a tlai lutuk tawh.

           Vawiina helaia lo kal te, TV a lo thlirte leh Zoram mipuite hian Africa rama chhiatrupna thleng ang khuan min hmuak reng a ni tih kan hriat a, a tlai lutuk hma hian khutiang dinhmun khu kan pumpelh theih nan mahni hma zawn theuhah theihtawp tak meuh kan chhuah a ngai ta. He natna hi midang natna a ni lo, Mizote natna a ni a, a tuartu pawh Mizote kan ni a, a dona ah pawh sap ho leh India sorkar tha leh sum ringawta kan do hi a tawk tawh lo, keimahni kan insenso ve a ngai ta. Kan ram hi chhan tlak a la awm laia kan chet loh chuan rei lote ah a tlai lutuk mai dawn. AIDS dona ah insawisel leh indo hman kan ni tawh lo, mahni hma zawn theuhah kan do tlan a ngai ta.

CHUTI ENGE KAN TIH TAK ANG?
           AIDS hi natna fing tak a va ni em! Hmuh theih leh hriat theih si loh ah hian kan chakloh berna lai, kan insum theih loh berna lai, kan Nuna thuruk ber bera kan neih - Sex leh Drugs hmangin kan ram hi a rawn run ta a nih hi le! Do hneh a va har em! HIV hi Nula hmeltha tak ang te, Tlangval hmeltha leh zei tak ang tea inthuamin nula buan chak lote, Tlangval insum thei lote hnenah Dracula in mihring a seh tawh chu Dracula a an chang ve zel ang hian HIV hrik chu a darh zel a. Pa nupui nei tawh te pawh an bang chuang lo, KS leh KS tia inchhal duh chiah lo Hmeichhia tam tak pawh sum leh pai itna nen, pawisak lohna siamtu Zu nen chawhpawlhin nawmsak bawlna ah insum theilova tluk luh tirin, chu Natna hrik te reuh te chuan bu a lo khuar zel a, an nupui ah hnawih lehin nu pumchhunga naute ah thleng a lut kual ta thin a ni. Nu leh nau pawisawi lo te thlengin an kai a, nula tlangval fel tak takin nupui pasal neih fuh loh vangte, an tunhma nuna an lo chet chhiat zauh an sim daih tawh hnu pawhin bu lo khuar ru khiau-in, a hnu fe ah a rawn lang chhuak leh chauh thin a ni.

           He natna hrik fing vervek tawpkhawk hi Dan dan a awm em? He natna hrik te reuh te fing tak hi engtinnge kan lo fin khalh dawn? Natna hrik te lutuk hian kan ram min suat mai ang maw? Ka thalai puite u, YMA member te u, hawh u, he natna hrik hi I fin khalh ang u, I bum ang u, I hawihai tir ila, I ti chavai ang u. STOP AIDS tih angin tuna a kai chin bakah hi chuan A TAWK TAWH i ti teh ang u. He natna hrik hneh theih dan kan sawi dawn, ngun deuhvin I ngaihven ang u, I zawm ang u.

           A hmasa berah chuan he natna do tura kan hriat tur chu ‘Nungchang kaihhnawih’ natna a nih angin kan do letna atana pawimawh ber chu KAN NUNGCHANG a ni. AIDS natna hrik lo dan nana pawimawh hmasa ber chu NUNGCHANG THA a ni tih hi hria ila I harhchhuak ang u. Sex hmankhawlohna leh Drugs atangin fihlim ila he natna hrik hi kan ramah a awm rei peih lovang. Chuvangin AIDS laka fihlim tur chuan kan sawi thin ABC a pawimawh.

ABC chu enge?
           ‘A’ chu Abstain- ‘Sex lakah fihlim rawh’ tihna a ni a. ‘B’ chu ‘Be faithful to your partner’ – I nupui pasal lakah rinawm tlat la, midang sex hmanpui suh’ tih a ni. Hei hi sawi hmasa phawt ang. Thalaite Nupui pasal la nei lo kan nih chuan Nupui pasal kan neih hmaa kan thianghlimna ‘virginity’ kan vawnhim tlat hi AIDS laka fihlimna kawng hmasa ber a ni. Thalai tam tak hetiang ti tura intiam kan neite hi a va lawmawm em! Tin, nula tlangval emaw nuthlawi pathlawi i nih a, sex i lo hmang tawh a nih pawhin tun atang chuan kei pawh ka fihlim tawh ang tih theih a pawimawh. Hetianga Insumna, thianghlimna vawn theih dan tawite te in lo tarlang ang-
1.     Inneih hmaa Sex hman that loh zia kan hriat a ngai, chungte chu –
          • Pathian duh loh zawng a ni
          • Sex atangin natna tam tak –AIDS, Hepatitis, VD Hrang hrang damchhunga taksa tana pawi thei a kai theih
          • Naupai leh Nau tihthlak hial a thlen thei.
          • Rilru hrehawmna nasa tak- inthiamlohna, mahni inngaih hniamna, thil dang pawisak lohna thlentu a ni
          • Nupui pasal atan tum loh pui neihna a ni a, Nupa nun hlim lo thlentu a ni
          • Future tih chhiat vekna a ni
2.     Ngaihzawng I neihin I nupui pasal tur ngei ni a I hriat loh chu la serious vak lo la, in chul nel lutuk suh u.
3.     Mipa leh Hmeichhia Sex hman theihna chance in siam loh tur - pahnih chauha awm fal loh te, Zan chhuah a ngaiha kalpui neih te (hmeichhe tan hmeichhe dang)
4.     Zan vah chhuah uar suh – in lama awm tam zir tur
5.    Ruihtheih thil, Beer, grape Wine pawh tem chhin duh suh (Thalai tam tak te chetsualna a ni)
6.    Sex lam hawi- Video, internet, thlalak etc en loh hram tum rawh. Mobile atangin delete vek rawh.
7.    Mahni in ngai hlu rawh – Sex ah ho taka awm mai mai tur ka ni lo, Pathian siam ropui tak ka ni a, Drugs
       bawih atan te, Sex bawih atante ka in phal lo.
8.    A bik takin hmeichhia te u, mipa te’n dawt tinrenga an thlem hunah che awih suh u ‘No’ tih dan zir rawh u-
       Dawt thenkhat leh I lo dawnsawn dan tur-
        •     Kan in hmangaih sawt ang.- A hmusit zui viau zawk ang che.
        •    Min hmangaih tak tak chuan…Min hmangaih tak2 chuan I tum lovang. Min zah hlawl lo em ni?
        •     Tun tum chauh..Vawikhatah a lungawi chuang lovang.
        •     Kan in hriat reng nan….AIDS or Naute min present chuan kan inhre rei ngawt ang
        •     I duh loh chuan midang ka zawng mai ang..In hlim dun ka beisei..Bye.
        •     Midang pawn an ti vek tho..Dawt! Invawng thianghlim fel tak tak tam tak an tam
        •     Lungngai suh, invenna Condom kan hmang dawn alawm..Kei pawn invenna chu ka nei, 100% in a him,
               chu chu ‘NO’ tih hi a ni.
9.    Hmanlai nunzia Tlangval nula ngaih tama inel te, Hmeichhia rimtu leh ngaizawngtu ngaha inelte kha thil thing a ni tawh. Nungchang tha leh invawng fel apiang ngaihsan an ni tawh zawk.
10.    Kan culture a tha lo tak Nupui Ruk hi I tibo ang u. Nupui Ruk hi a changkang lo em mai! Mi fa duh lai, Nu leh Pa te nena inbiakrem hmasak leh engmah sawi hmasak pawh awm lova, mahni inchhunga rawn hruai luh ngawt mai hi chu. Kan Nu leh Pa te pawh an zahawm lutuk, vai kan tihte kan tluk lo lutuk. Tunlaiah Mipa te’n hmeichhia te lehkha zir, hnathawh engkimah kan tluk tawh lova, kan Nulate hian Pasal an ruk hun hi a thleng tep ang tih a hlauhawm.
11.    Nupui pasal neih tur chu fimkhur takin HIV kai lo ngei neih tur a ni. Hmelah a lang lo, hmeltha leh luck apiang an hlauhawm ting maithei. Chuvangin Nupui Pasal innei tur reng reng chu HIV I test tir vek ang u, kan pahnihin test duna a result ngaihthlak dun ngam tur.
12.    Drugs hi I do tlat ang u, kumpuan a ni emaw ni lo emaw, tha thlah lovin I do zel ang u.

C- Condoms:
           A invenna A & B kan sawi tawh a, C = condoms kan sawi leh lawk ang: A leh B chu nupui pasal ni lo chu sex hmanpui loh tur tih kan sawi zo chiah a, chu chu a tha leh him ber a ni. Chutia kan sawi reng lai leh kan hriat reng chung pawhin engemaw zat chuan kan awih duh lova, kan insum thei lova, nulat tlangval laia sex hmangte, Nupui pasal nei reng chunga midang va kawp duh tlatte kan la awm lui talh zel. Chung ho tan chuan AIDS laka an him theih nan kawng khat chiah a awm. Chu chu C- Condoms a ni. Chutianga insum thei lo chuan Condoms hi a chetsual apiangin (a chang chang ni lovin), a hman dan tur dik thlapin a hmang ziah tur a ni. Condoms hi kan sawisel thin naa kan ramah Sex hamnsualna kan tih ban theih hma rih chuan kan thlauhthla thei lo. Condoms hi Medical device (Damdawi hmanrua) chikhat a ni a, medical device tangkai tak, tunlai khawvelah phei chuan Nunna chhan tamtu ber pawl a ni. Chuvangin Nula tlangvalte u, insum ula sex lakah fihlim rawh u, mahse in lo hmang dawn talh a nih chuan condoms hmang ngei ngei rawh u. Ani chu ka hre chiang ka bialpa ka bialnu a ni a, HIV a pai lo hrim hrim tia inti ngaihthaa Condoms hmang duh lova HIV kai ta te chanchin a nih kha kan sawi - Mi 5000 HIV kai tawh an awm tih kan tih khan. Pa te u, KS in dawr hian an mahni hnen atanga ngeia kan hriat danin tam tak chu Condoms in hmang duh lo, Condoms hmang lo ila a let ka pe ang che ti te in la awm. Nang leh I nupui leh I fate him nan KS kawm lo hram rawh, I kawm talh a nih chuan Condoms hmang ngei ngei rawh. Ka rui lutuka ka hmang nge hmang lo pawh ka hre lo ti hian mi tam takin HIV an kai ta.

           Chuvangin HIV AIDS kan rama min run mektu hi hneha a awm theih nan Mizo mipuite hian hetiang hian kan intiam thei em?

HIV/AIDS KAI LO TURIN I INTIAM THEI EM?
1. Nula tlangval emaw zawnglai i nih chuan Kan rama AIDS do nan inneih hma chu Sex hmang lo turin I intiam thei em?
2. Nula tlangval emaw zawnglai i nih a, sex i lo hmang tawh a nih pawhin Kan rama AIDS do nan tun atang chuan inneih hma chu hmang tawh lo turin i intiam thei em?
3. Nupui pasal nei tawh i nih chuan Kan rama AIDS do nan damchhungin i nupui pasal lakah rinawm tlat turin i intiam thei em?
4. Nupui pasal nei tawh i nih a, i kawppui laka lo rinawm tawh lo i nih chuan Kan rama AIDS do nan tun atang chuan rinawm tlat tawh turin i intiam thei em?
5. Sum emaw ruihtheih thil emaw Hnawmhnaw Mobile phone, Top up it vanga inzuar thin i nih chuan Kan rama AIDS do nan Inzuar tawh lo turin i intiam thei em?
6. KS sex i lo dawr thin a nih chuan Kan rama AIDS do nan ti tawh lo turin i intiam thei em? I dawr talh dawn a nih chuan Kan rama AIDS do nan Condoms hmang ziah turin i intiam thei em?
7. I nupui emaw pasal emaw ni lo sex i hmanpui dawn talh a nih chuan Kan rama AIDS do nan condoms hmang ngei turin i intiam thei em?
8. Sum emaw ruihtheih thil emaw hmuh nana i inzuar thin a nih a, i la sim theih rih si loh chuan Kan rama AIDS do nan Condoms tel lo chuan sex hmang lo turin i intiam thei em?
9. Drugs la ti ngai lo i nih chuan Kan rama AIDS do nan ti chhin miah lo turin i intiam thei em?
10. Drugs a i inchiu thin a nih chuan Kan rama AIDS do nan Syringe, hriau leh hmanraw dang thianghlim hmang a, tumah dang tawmpui lo turin i intiam thei em?
11. Nangmah emaw, i kawppui emaw HIV kai thei tura i lo awm tawh a nih chuan Kan rama AIDS do nan hun remchang hmasa berah ICTC hnai berah i thisen test tir turin i intiam thei em?

A VEI TAWHTE LEH A ENKAWLNA LAM:
           Awle, thil pakhat ka sawi leh duh chu Mi sang sing tel HIV kai kan lo awm ta a, kan la kai belh zel bawk avangin HIV Postive te chungchang hi kan sawi hmaih thei lovang. Theihtawpin Invenna lamah kan tan laiin vanduaite an lo awm ta nawk a, chhungtin mai hi AIDS in emaw Drugs in emaw min khawih ta a ni. Vanduai avanga HIV lo kai palhte hnena ka sawi duh chu an tan Chanchintha a awm a ni. HIV kai tawh pawh lo ni ila, indawmkun a, rilru hah a, hrehawm ti taka kimki reng tur kan ni lo. Tunah chuan AIDS veite tan inenkawlna tha tak Antiretroviral drugs, Antiretroviral therapy (ART), drugs damdawi tupawh a mamawhte tan chuan Sorkarin a thlawnin a pe reng tawh a ni. Tunhmaa kum 5-10 vela thi mai tura ngaih kha tunah chuan damdawi chi hrang hrang hmangin a inenkawl theih tawh a; natna tihdam theih loh dang- Zunthlum te, BP Sang te angin a control na damdawi a awm tawh a, inenkawlna an dawn that chuan mi pangngai dam chen tho an dam thei tawh a, hna an thawk thei a, ei an zawng thei a, hlim takin an nun an hmang thei a ni tih hi ka sawi duh a ni. Thalai HIV positive hmuhchhuah thar kha I rilru hah em em in, mahni nunna lak duhna hialte I lo nei palh ang e, i tan chanchintha a awm. Aizawlah ART Centre tha tak din a ni tawh a, MSACS chuan Lunglei ah leh Champhai ah ART Centre kan din leh mek a, district dang zawng 5 ah Damdawi lak chhunzawmna Link ART Centre a awm ta bawk. Tin, ICTC ah te, HIV Positive ho intelkhawmna pawlah te, NGO hrang hrangahte englai pawhin mipui mimira I nihna puangzar lovin tanpuina I dawng thei tih lo hria la. Telephone No 1097 ah BSNL hmangin HV chungchang a zawhfiah theih reng a, heta hian a call tu te tan pawisa sen a awm lo, Toll free a ni. Tin, NGO hrang hrang hi MSACS te’n kan thawhpui a, an hnathawktute hlawh tur tlemte kan tum sak ve thin a; an ni in an sum leh pai leh tha leh zung tam tak sen belhin kan rama AIDS darh zel loh nan KS zingah te, Drug addict zingah te hma an la thin. Heng an hmalakna te hi Sorkar Policy zawma hma la an ni a, khawvel hmuntina an tih dan tha ber ber mila hma lak a ni. Chutihlaiin, MSACS leh NGO te hmalakna thenkhatin hrethiam lovin Needle leh Syringe Exchange Program kan kalpui dante a zik tluaka hre si lovin, an hnawk tih leh chhuanlam hrang hrang avangin hengte hi an lo tih tawp sak a, Drop In Centre te hial khar sak an ni thin hi a pawi hle a ni. Hei hi I in hriatthiam sak hram hram ang u tiin YMA Conference ah hian ngenna ka siam a ni. Central YMA te’n an hrethiam a, Drugs kan dona ah pawh Needle Syringe Exchange rogramme te hi chu thil pawimawh tak hriatthiam theuh tur a ni e an ti lawm lawm a; hei hi a ngawl lo vei tawhte chhanchhuah nana kailawn tam tak zinga pawimawh tak pakhat a nih avangte, AIDS darh zel tur venna hmanraw pawimawh lutuk a nih bawk avangin I hrethiam hram hram ang u. Heng zawng zawng hi khawtlang kan that tlanna tur a nih avangin engemaw hriatthiam loh lai kan neih te, duh loh dan deuha thil a lo awm a nih pawhin mahni in action la nghal mai lovin MSACS te, Central YMA te rawn hmasa in hrilh hmasa hram hram ila tiin ngenna kan siam a ni e.

           A vei tawhte enkawlna leh chhawmdawlna ah hian MSACS te, Sorkar te chuan theihtawp chhuah mah ila a tawk lo. Department dang an pawimawh, Transport department in an Bus ah a free in chuan an lo phalsakte, Food, Civil Supplies & Consumer Affairs ten HIV Positive chhungkua te AAY ah telh an lo phal te a lawmawm hle. Heng hi a la tawk mai lo fo. An inenkawlna hmun an pan nana senso ngai senso tur neih loh avanga ART Centre thleng thei lote, an nu leh pa te’n an thih san avanga school kal zawm thei lote, chhungkuaa ei zawng ber thih avanga eizawnna buai zo vekte, AIDS avanga fahrah tam tak khawngaihthlak tak tak te an tam mai. Thu ringawta khawngaih a tawk lo, Tlawmngai pawl leh Kohhrante pawhin hetiang te chhawmdawlna hna leh Mi tih harsa tak tak addict leh KS kan tih chhanchhuah hnate hi nasa leh zualin I thawk ang u.

           AIDS hian kan Mizo nunze mawi tak tak a rawn khawih tel mek. Natna pakhat vei avang maia In endawngna te, in enhranna te, in hmuhsit leh inhnualsuatna te a awm tir thin hi a va pawi em! A fing vervek lutuk mai hi a va ngeiawm em! Mitthi vui leh phum chungchangah pawh kan hnam ze mawi tak chhawm nung chung zelin thil kalpui a tih theih a ni a, phum hma vui hma a ngai lo. Chuvangin AIDS hma chhawn tur hian kan Nungchang tha in do ila, a veite pawh tumah thlei bik awm lovin natna dang vei ang thovin Mizo takin YMA takin chhawmdawl zel ila, mahni hma zawn theuhah kan tih theih theuhah tlanchhe lovin, haider lovin, AIDS chungchang zir chiang chung zelin hma la ila. Khawvel mit hmuhah khawvelin an entawn turin YMA takin hma ila zel ang u. Tichuan kan ramah AIDS kan hneh ngei ang. YMA dam reng rawh se.