MSACS Governing Body Meeting
HIV/AIDS dona kawng a Mizoram State a thuneitu sang ber Governing Body chu an Chairman Health Minister Pu Lalrinliana Sailo hovin March ni 16, 2009 chawhnu khan I&PR Conference Hall ah an thukhawm.Meeting kaihruaiin Health Minister chuan khawvel pumin natna hlauhawm leh tihdam theihloh a do mek laiin Mizoram-ah pawh theihtawp a AIDS dona kalpui a nih thu a sawi a. Kawng thenkhat ah hmasawnna hmuh tur a awm laiin kawng thenkhat ah erawh tlakhniamna a awm avangin chak lehzuala beihpui thlak zel a tul tih thu a sawi. AIDS dona kawnga pawl hrang hrang leh sorkar department te, thawktu huam zau thei ang bera inhmuhkhawma kalzel dan tur sawiho tha a tih thu minister hian sawi langin, member te chu an ngaihtuahna fim tak hmanga an mahni zawn theuh a tan la leh zual turin a chah.
Mizoram Chief Secretary Pu Vanhela Pachuau pawhin sawrkar tharah Minister thar kaihhruaina hnuaia General Body meeting hmasa ber neih a ni thei chu lawmthu a sawi a, kum kalta lama MSACS kalphung tlangpui a tarlang.
Meeting ah hian kum 2008 – 09 kalta chunga MSACS hmalak dan tlangpui chu Project Director Dr K Ropar’in sawiin kawng tam takah he kum chhunga hlen tur target siam te chu hlen a nih dan te, hmachawp an neih hrang hrang te a sawifiah. 2009 – 2010 kum thar atana action plan pawh sawrkar laipui hnuaia National AIDS Control Organization pawmpui tura chhawpchuah mek a nih dan leh rawtna te hi an pawmpui ngei pawh a rinawm thu Project Director chuan a sawi.
India ram puma AIDS natna do kawngah tunah hian National AIDS Control Program Phase III na kalpui mek a ni a. He program in a tum ber chu kum 2012 ah chuan ram pumah AIDS vei thar tur tihtawp vek tura hmalak a ni a, National AIDS Control Organization kaihhruaiin India ram state tinah State AIDS Control Society in program hi chak takin a kalpui mek a ni.
